 |
| Art Card by the Author |
Hayaan mo akong hawakan ang iyong kamay
Habang tayo ay naglalakbay sa maalon na dagat,
Kahit naglalakad tayo sa kapatagan,
O kahit nasa gitna 'man tayo ng bagyo
Hayaan mo sana ako patahanin ka
Sa mga panahon na tumutulo na ang iyong mga luha
Nawa’y ang aking mga mahigpit na yakap
Ang magsilbing tahanan mo sa pansamantala
Hayaan mo sana ang iyong sarili ipasa ang dinadala mong bigat
Sa aking mga balikat
Halata naman na kay tagal mo na pinapasan ang bigat ng mundo
Halika’t magpahinga, hindi ka nag-iisa, kailanman hindi ka pabigat
Hayaan mo ang sarili mong huminga
Makakaahon din tayo sa ating pagkalunod
Hayaan mo ang sarili mong umasa
Dahil ako’y naniniwala na balang araw hihilom din ang ating mga sugat
Hayaan mo lang ang sarili mo maramdaman ang bawat sakit at lungkot
Nawa’y bigyan mo ng pagkakataon ang sarili mong maghilom
Huwag kang magmadali, hawak mo ang iyong oras
Huwag ka mag-alala, andito lang ako mananatili—
Hinihintay ang iyong pagbangon muli.
