Art Card by Mika Orolfo
Sabi nila, ang pagmamahal ay mapagpalaya
Kaya siguro ginagawa natin ang makakaya
Na lahat ay nakaugat sa pag-ibig
Para sa bayang ayaw na muli malupig
Ngunit sa paglipas ng panahon,
Mga utak ng mga mamamayan ang nilason
Ng mga sanay sa ibabaw ng tatsulok
Sanay na mabibili ang midya gamit ng mga iba’t-ibang alok
Hindi ba nila alam?
Ang kapangyarihan nila’y hiram
Mula sa nililingkurang taong-bayan
Na lagi naman nila tinataguan kapag nangnanakaw sa kaban
Ang pagmamahal ay mapagpalaya, ika nga nila
Kaya ang ating mga mamahayag, tapang ang dala
Sa bawat storya at balita
Para sa bayang binibigyang halaga
Kaya naman, kailan ba natin tutulungan?
Ang mga mamahayag na walang kinikilingan
Nasa puso ang serbisyo kaya hindi tayo mabibigo
Dahil ang pagmamahal ay hindi lang ang paglaya, ito rin ang hudyat ng pagbabago.
