.png) |
| Photo by the Author |
Isa sa mga pundasyon ng demokrasya
Ang mga tagapahayag na nagbabalita,
Ng katotohanan sa masa
Kahit buhay nila'y nakataya
Lalo na sa panahong ito,
Na ang kalaban ay gobyerno
Patayan doon at dito,
upang katotohana'y maitago
Kabilang na din ang pagsasara
Ng isang network ng masa,
Na pilit lumaban para sa kinabukasan
Ngunit nanaig parin ang kasakiman
Walang awang tinanggalan
Ng trabaho ang mga mamamayan,
Para lamang sa kapangyarihan
Na tila'y kanilang diyos-diyosan
Sa panahon ngayon, ang magsalita
Ay tila isang malaking sugal,
Na kung saan buhay mo'y nakataya
Kahihinatnan mo pa'y karumal dumal
Mga tagapahayag ngayo'y tuliro
Dahil isang salita lang laban sa nakaupo
Katumbas na nito'y kanilang mga ulo
O kaya nama'y bagsak nila ay sa presinto
Ang demokrasya at katotohanan
Ay unti-unti ng nilapastangan
Ng mga gahamang nasa kapangyarihan,
Na siya na ding naging sakit ng bayan
Hahayaan mo nalang bang magpatuloy ito?
O ika'y makikiisa sa pagsusumamo
Ng mga tagapahayag na nagsakripisyo
Upang katotohana'y maipadala sa mga tao?
Hahayaan mo ba ang patuloy na pagsupil sa katotohanan?
Ang pagkitil sa demokrasya?
Ang pang-aalipusta sa kalayaan?
O ika'y magiging tagapag-adya,
Ng katotohanang dapat protektahan?
Sigihan mo ang pag-iisip
At gisingin ang diwang nahihimbing
Marahil isang araw ika'y magigising,
Ang katotohanan naman ang nahihimbing.
.png)